Amakuru

Amerika yemeje umuti wa Remdesivir nk’umuti wa COVID-19

Ikigo cy’Amerika kigenzura Ubuziranenge bw’ibiribwa n’imiti (FDA) cyatanze uruhushya rwo mu bihe bidasanzwe rw’uko umuti Remdesivir wa Ebola witabazwa mu kuvura icyorezo cya Coronavirus.

Uru ruhushya ruvuze ko uyu muti wica virusi ubu ushobora gukoreshwa ku bantu bari mu bitaro barembye kubera Covid-19, indwara y’ubuhumekero iterwa n’ubu bwoko bushya bwa coronavirus.

Igeragezwa ku barwayi uwo muti uherutse gukorerwa ryafashije mu kugabanya igihe bifata ngo abarwaye coronavirus barembye bakire.

Ariko uru ruhushya rwa FDA rwo mu bihe bidasanzwe ntabwo ari cyo kimwe n’uruhushya rusanzwe ubundi rusaba ubugenzuzi bwo ku rwego rwo hejuru.

Impuguke zanaburiye ko uwo muti ubusanzwe wakorewe kuvura Ebola, ukaba ukorwa n’uruganda Gilead rw’imiti udakwiye kubonwa nk’umuti ntakuka wa Coronavirus.

Daniel O’Day, umuyobozi mukuru w’uruganda Gilead mu kiganiro yagiranye na Perezida Donald Trump w’Amerika mu biro bye bya White House, yavuze ko urwo ruhushya rwatanzwe n’ikigo FDA ari intambwe ya mbere y’ingenzi itewe.

Yavuze ko uru ruganda rugiye gutanga imfashanyo ingana na miliyoni imwe n’igice y’uducupa tw’uwo muti.

Stephen Hahn, wo mu kigo FDA, na we wari muri iyo nama, yagize ati : “Ni wo muti wa mbere wemejwe wa Covid-19, rero twishimiye rwose kuba twabigizemo uruhare.”

Ni iki tuzi kuri uyu muti wa Remdesivir?

Perezida Trump yakomeje gushyigikira remdesivir nk’umuti ushobora kuvura coronavirus.

Ubwo wageragerezwaga ku barwayi, ikigo cy’Amerika cyita ku ndwara zandura n’ingaruka zigira ku mubiri (NIAID) cyasanze umuti wa remdesivir ugabanya igihe ibimenyetso bya coronavirus bimara kikava ku minsi 15 kikagera kuri 11.

Iryo geragezwa ryakorewe ku bantu 1,063 bo mu bitaro bitandukanye ku isi.

BBC dukesha iyi nkuru ivuga ko bamwe muri bo bahawe uwo muti, abandi bahabwa umuti utayivura, bizwi mu buvuzi nka ’placebo’.

Dr Anthony Fauci ukuriye ikigo NIAID, yavuze ko umuti wa remdesivir wagize ingaruka igaragara neza, ikomeye kandi nziza mu kugabanya igihe cyo gukira Covid-19.

Nubwo umuti wa remdesivir ushobora gufasha mu gukira ndetse bishoboka ko watuma abantu bareka kuvurirwa mu byumba by’indembe, amagerageza yawo ntabwo yagaragaje neza niba ushobora kurinda ko habaho impfu zitewe na coronavirus.

Kanda utange igitekerezo

Subiza ku gitekerezo cyatanzwe

Your email address will not be published. Required fields are marked *

Solve : *
26 + 14 =


IZASOMWE CYANE

To Top