Kuva tariki 21 kugeza 31 Nyakanga 2019 muri Repubulika iharanira Demokarasi ya Kongo “RDC” hazaba irushanwa mpuzamahanga mu mukino wo gusiganwa ku magare “Tour cycliste international de la RDC 2019”.
Iri rushanwa rigiye kuba ku nshuro 7 rizitabirwa n’ikipe ya Benediction Excel Energy aho izaba igizwe n’abakinnyi 6 ari bo Uwizeyimana Bonaventure wegukanye shampiyona y’u Rwanda ya 2019 akaba yaranegukanye intera ya mbere ya Rwanda Cycling Cup 2019 hari kandi Byukusenge Patrick, Nsengimana Jean Bosco, Nzafashwanayo Jean Claude, Uwiduhaye Mike na Ruberwa Jean Damascene.
Umuyobozi w’iyi kipe akaba asanzwe ari n’umutoza wungirije w’ikipe y’igihugu, Sempoma Felix yatangaje ko aba bakinnyi bamaze iminsi bitoza kandi biteguye kwitwara neza.
Yakomeje avuga ko bamaze kuboherereza ubutumire igisigaye ari uko bohererezwa amatike y’indege kugira ngo berekeze muri kiriya gihugu aho bitagize igihinduka bazagenda ku wa Gatanu tariki 19 Nyakanga 2019.
Mu bakinnyi 6 iyi kipe izajyana muri RDC harimo 2 ( Ruberwa Jean Damascene na Uwiduhaye) bakinira ikipe ya Nyabihu CT. Sempoma avuga ko ari uburyo bwo kubafasha na bo ngo bakine amasiganwa mpuzamahanga.
Muri uyu mwaka wa 2019 ni inshuro ya gatatu iyi kipe igiye kwitabira isiganwa mpuzamahanga nyuma ya Tour du Rwanda 2019 yabaye tariki 24 Gashyantare kugeza 03 Werurwe 2019. Iyi kipe kandi tariki 15 kugeza 18 Gicurasi 2019 yitabiriye isiganwa muri Afurika y’Epfo “Tour de Limpopo 2019”.
Abakinyi bazaserukira RDC muri iri rushanwa bagera kuri 25 bakaba bamaze hafi ibyumweru bisaga 2 bitoreza mu kigo k’imyitozo i Musanze aho baje mu rwego rwo gukaza imyiteguro kugira ngo bazitware neza muri iri siganwa ry’iwabo.
Iri rushanwa riheruka muri 2018 ubwo ryabaga ku nshuro ya 6 ryitabiriwe n’abakinnyi 136 bari bavuye mu bihugu 15 bitandukanye birimo u Rwanda, Burkina Faso, u Buholandi, Angola, u Bufaransa, Cote d’Ivoire, RDC yari ifite amakipe abiri, Senegal, Benin, Nigeria na Niger.
Umukinnyi ukomoka mu Buholandi, Jacob Buijik ni we wegukanye iri rushanwa akurikirwa na Hadi Janvier wa Benediction Excel Energy naho ku mwanya wa 3 haza Matthias Sanogo ukomoka muri Burkina Faso. Muhindo Jimmy ni we mukinnyi ukomoka muri RDC witwaye neza.
Muri iri rushanwa ikipe yitwaye neza ni Benediction Excel Energy (Rwanda) hakurikiraho Burkina Faso, ikipe y’u Buholandi iza ku mwanya wa 3.
