Ikipe y’u Rwanda “Amavubi” mu gushaka itike y’imikino y’Afurika y’ibihugu mu bakinnyi bakina imbere mu gihugu “ CHAN 2020” izakina n’ikipe y’igihugu ya Ethiopia.
Mbere y’umukino ubanza uzaba tariki 22 Nzeri 2019, ikipe y’u Rwanda izakina umukino wa gicuti n’ikipe y’igihugu ya RDC.
Nk’uko tubikesha ishyirahamwe ry’umupira w’amaguru mu Rwanda “FERWAFA”, uyu mukino uzabera kuri Sitade des Martyrs i Kinshasa muri RDC tariki 18 Nzeri 2019.
Ikipe ya RDC izaba yitegura gukina n’ikipe ya Central Africa Republic mu gihe ikipe y’u Rwanda izamara gukina uyu mukino tariki 19 Nzeri 2019 ikerekeza muri Ethiopia aho izakina umukino ubanza na Ethiopia tariki 22 Nzeri 2019.
Izi kipe zombi, u Rwanda na RDC zaherukaga gukina muri ¼ muri CHAN 2016 yabereye mu Rwanda aho ikipe ya RDC yatsinze u Rwanda ibitego 2-1 gusa mbere y’uko iri rushanwa ritangira , ikipe y’u Rwanda yari yatsinze ikipe ya RDC igitego 1-0 cya Tuyisenge Jacques mu mukino wa gicuti wabereye i Rubavu tariki 30 Mutarama 2016.
Ikipe ya RDC ni yo ifite agahigo ko kwegukana CHAN inshuro nyinshi 2 (2009 na 2016), RDC uretse muri 2018 itabashije kubona itike izindi nshuro yaritabiriye (2009, 2011,2014 na 2016). Ku ruhande rw’ikipe y’u Rwanda mu nshuro 5 ziheruka yibabiriye inshuro 2 (2011,2016 na 2018).
Ikipe y’u Rwanda si ubwa mbere igiye gukina na Ethiopia
Kugira ngo ikipe y’u Rwanda ibone itike ya CHAN 2020 birayisaba gutsinda ikipe ya Ethiopia. Izi kipe si ubwa mbere zigiye guhura kuko muri 2014, Ethiopia ni yo yabujije u Rwanda kujya muri CHAN 2014 yabereye muri Afurika y’Epfo.
Muri CHAN 2018, ikipe y’ u Rwanda yabonye itike isezereye ikipe y’igihugu ya Ethiopia. Mu gushaka itike ya CHAN 2020, izi kipe zigiye kongera guhura. Ethiopia mu ijonjora ry’ibanze yasezereye Djibouti ku bitego 5-3 mu mikino yombi.
Ikipe y’u Rwanda nta bwo yigeze itangirira mu majonjora y’ibanze kuko iri mu makipe afite amanota meza muri aka karere k’Afurika y’u Burasirazuba nyuma yo kwitwara neza muri CHAN iheruka kwitabira (2011, 2016 na 2018).
Imikino ya nyuma ya CHAN 2020 izabera muri Cameroun. Ikipe ya RDC yegukanye iri rushanwa inshuro 2 (2009 na 2016), Tunizia (2011), Libiya (2014) na Maroc (2018).
Tariki 18-09-2019
RDC-Rwanda (Kinshasa)
Tariki 22-09-2019
Ethiopia-Rwanda (Addis Abeba)
Tariki 19-10-2019
Rwanda-Ethiopia (Kigali)
