Amakuru

Menya amateka yo mu Bisi bya Huye

Umukecuru Muhimakazi  Antoniya w’imyaka 104 utuye mu murenge wa Huye, akarere ka Huye mu ntara y’Amajyepfo arasobanura amateka yo kwa Nyagakecuru mu Bisi bya Huye yemeza  ko yanajyagayo gusoroma intagarasoryo akiri muto gusa Nyagakecuru ntiyari akiriho kuko yabayeho mu kinyejana cya 16.

Muhimakazi avuga ko hari ku Ngoma y’Umwami  Ruganzu Ndoli mu kinyejana cya 16, mu Bisi bya Huye hakaba hari hatuye umukecuru Benginzajye uzwi ku izina ry’akabyiniriro rya Nyagakecuru, umugabo akitwa Samukende, watwaraga Ubungwe. Nyagakecuru  yabaga mu nzu yubakishije imiyonza n’ibitovu igakikizwa n’ibihuru. Akaba yari azwi cyane afatwa nk’igihangange kuko yari azi kubuguza. Binavugwa ko uyu mukecuru yari atunze inzoka nini cyane yitwa uruziramire ariyo yakuragamo ububasha butuma aba igihangange.

Uyu Mukecuru ufite indangururamajwi niwe waganirije umunyamakuru wa The Bridge Magazine amateka yo mu Bisi bya Huye kwa Nyagakecuru

Ikindi ni uko ibitero byose byagabwaga kuri Nyagacekuru  inzoka ye yahanganaga nabyo ikabatsinda, ibi bikababaza Umwami Ruganzu kuko Nyagakecuru yafatwaga nk’igihangange no kumurenza. Ndetse Umwami yasabye isogi n’intagarasoryo Nyagakecuru arazimwima.

Ikindi ni uko Umwami Ruganzu uko yajyaga  kubuguza na Nyagacekuru, Umwami yatsindwaga.

Urutare ruriho igisoro Umwami Ruganzu na Nyagakecuru babugurizagaho

Muhimakazi akomeza avuga ko Ruganzu yaje kwiga amayeri yigira inshuti  ya Nyagakecuru amworoza ihene zirya bya bitovu, ya nzoka irigendera  kandi iyi nzoka niyo bavugaga ko ibamo imitsindo ya Nyagakecuru. Umwami Ruganzu yahise amutera yifashishije ingabo ze zitwaga Ibisumizi, aramwirukankana  amugeza ku rutare rwa Munanira i Busoro akaba ari naho Nyagacekuru yaguye.

Kuri ubu iyo utembereye mu mpinga y’uyu musozi ufite ubutumburuke bwa metero 2400 uhasanga bimwe mu bimenyetso bigaragaza amateka ya Nyagakecuru.

Ikiyaga gito ari nacyo inka za Nyagakecuru zashokeragaho, ndetse hakaba hakigaragara ibitovu, umwobo w’uruziramire, urutare ruriho igisoro Umwami Ruganzu na Nyagakecuru  babugurizagaho n’amajanja y’imbwa.

Hasurwa n’abantu batandukanye

Mu rwego rwo gushyigikira ubukerarugendo bushingiye ku muco n’amateka ya Nyagakecuru  kuri ubu hakaba hari ishyirahamwe ryitwa Mountain Sports Club Ibisumizi rifasha abantu kuzamuka uyu musozi bakora sport n’ibindi bikorwa bibungura ubumenyi ku mateka yaharanze.

Kanda utange igitekerezo

Subiza ku gitekerezo cyatanzwe

Your email address will not be published. Required fields are marked *

Solve : *
15 + 26 =


Most Popular

To Top