Patriots BBC na APR BBC ni zo zegukanye shampiyona ya 2018-2019

Ikipe ya Patriots BBC mu bagabo na APR BBC mu bagore  ni zo zegukanye  shampiyona ya 2018-2019 nyuma yo kwitwara neza mu mikino ya kamarampaka “BK National League Playoffs 2019”.

Iyi mikino yasojwe mu mpera z’iki cyumweru tariki 20 na 21 Nzeri 2019 muri Kigali Arena. Mu kiciro cy’abagabo, ikipe ya Patriots BBC yitwaye neza itsinda REG BBC imikino 4-3.

Iyi kipe ya Patriots BBC yabanje gutsinda umukino  wa   mbere ku manota 67 kuri 58 nyuma REG BBC itsinda imikino 3 yakurikiyeho  aho yatsinze  amanota 66 kuri 65, itsinda undi ku manota  64 kuri 59  inatsinda uwa 4  amanota  63 kuri 62.

Patriots BBC yari imaze gusa nk’aho yatakaje igikombe, ku mukino wa 5 wabaye tariki 11 Nzeri 2019 yitwaye neza itsinda REG BBC amanota 69 kuri 61 bituma ikizere ku gikombe kigaruka nk’uko n’umutoza wayo Mwinuka yabitangaje.

Tariki 20 Nzeri 2019 muri Kigali Arena ni bwo habaye umukino wa 6 nabwo ikipe ya Patriots BBC yitwara neza itsinda REG BBC amanota  78 kuri 60. Aha amakipe yari aganyije imikino 3 kui 3 hasigaye umukino wa 7 kugira ngo hamenyekane ikipe igomba kwegukana igikombe.

Uyu mukino wabaye tariki 21 Nzeri 2019, ikipe ya Patriots BBC yongeye kwitwara neza itsinda REG BBC amanota 65 kuri 59 birangira Patriots BBC itsinze REG BBC imikino 4-3.

Nyuma  gutsinda REG BBC, kapiteni w’ikipe ya Patriots BBC, Mugabe Aristide yatangaje ko  ubundi iyi aba ari imikino 7 ko bemera ko batsinzwe ari uko birangiye. Yakomeje avuga ko nk’abakinnyi bumvaga ko uko REG BBC yabatsinze imikino 3 nabo baza bakayitsinda.

Yagize ati : “Twaraganiriye nk’abakinnyi dusanga nitwe turi kwitsinda kuko badutsindaga bataturusha kubera amakosa twakoze tukabagarura mu mukino,  twagabanyije amakosa tubasha kwitwara neza   turabatsinda.”

Mugabe akaba yarashimiye abantu bose babaye inyuma bakabatera imbagara mu gihe hari ababonaga ko bidashoboka.

Umutoza wa Patriots BBC, Mwinuka Henry nawe yavuze ko imikino REG BBC yamutsinze itabaga  yamurushije cyane  ahubwo ko bwabaga ari uburangare, akomeza avuga ko    bagerageje gukosora amakosa bakoraga  bituma bitwara neza.

Ku ruhande rw’ikipe ya REG BBC, kapiteni Kubwimana Kazingufu Ali  yavuze ko bifuzaga  gutwara iki gikombe ariko bitabakundiye. Ati : “Patriots BBC yaturushije iradutsinda igisigaye ni ugutegura ubutaha.” Umutoza wugirije wa REG BBC, Ngwijuruvugo Patrick  yavuze ko ibi mu mikino ariko bigenda.

Yakomeje avuga ko Patriots BBC ari ikipe nziza bahora bahanganye. Ati : « Twarabatsinze babasha kureba amakosa bakoraga barayakosora baraza natwe baradutsinda, uyu munsi twagerageje guhangana ariko biragira dutsinzwe. »

Muri iki kiciro ikipe ya APR BBC ni yo yegukanye umwanya wa 3 itsinze Espoir BBC imikino 3-1.

Mu bagore, ikipe ya APR BBC ni yo yegukanye igikombe itsinze The Hoops imikino 4-2 mu gihe ikipe ya IPRC-Huye  yegukanye umwanya wa 3 itsinze Ubumwe BBC imikino 3-0.

Perezida w’ishyirahamwe ry’umukino wa Basketball mu Rwanda « FERWABA », Mugwiza Desire yavuze ko bishimira  ko umwaka w’imikino wagenze neza.   Agaruka kuri « Playoffs » yavuze ko habayemo guhangana cyane.

Dore mu mafoto uko byari byifashe

Kanda utange igitekerezo

Subiza ku gitekerezo cyatanzwe

Your email address will not be published. Required fields are marked *

Solve : *
30 × 28 =


Most Popular

To Top