Ikipe y’u Rwanda y’abahungu batarengeje imyaka 16 mu mukino wa Basketball iri muri Cap Vert aho yitabiriye imikino y’igikombe cy’Afurika “FIBA U16 African Championship 2019” yatangiye tariki tariki 05 ikazasozwa tariki 14 Nyakanga 2019.
Iyi kipe iri mu itsinda B hamwe na Cote d’Ivoire, Guinea, Mali ndetse na Tunizia mu gihe itsinda A ririmo Cap Vert, Misiri, Nigeria, Angola na Algeria.
Kuri iki cyumweru tariki 07 Nyakanga 2019 ni bwo ikipe ikina umukino wa mbere aho igomba guhura na Cote d’Ivoire, umukino uza kuba saa kenda zo muri Cap Vert (15h00) akaba ari saa kumi n’ebyiri (18h00) mu Rwanda.
Umukino wa kabiri iyi kipe y’u Rwanda izawukina tariki 08 Nyakanga 2019 aho izahura na Guinea. Tariki 09 Nyakanga 2019, ikipe y’u Rwanda izakina umukino wa 3 na Mali. Ikipe y’u Rwanda izasoza imikino yo mu matsinda tariki 10 Nyakanga 2019 ikina na Tunizia.
Ikipe y’u Rwanda yabonye itike y’igikombe cy’Afurika nyuma y’uko yitwaye neza yegukana igikombe k’irushanwa ry’Akarere ka 5 mu kiciro mu batarengeje imyaka 16 “2019 FIBA Africa Zone V 16 Championship” yabereye i Kigali kuva tariki 10 kugeza 15 Kamena 2019.
Mu mikino y’igikombe cy’Afurika iheruka “FIBA U-16 African Championship 2017”, yaberaga muri Mauritius kuva tariki 13-22 Nyakanga 2017, ikipe y’iguhugu y’u Rwanda yegukanye umwanya wa 6 mu bihugu 8 byari byitabiriye. Misiri ni yo yatwaye iki gikombe k’iri rushanwa, ikurikirwa na Mali, Algeria iba iya 3, Tunisia (4), Madagascar (5).
Abakinnyi 12 b’ikipe y’u Rwanda bitabiriye imikino y’Afurika
Aba bakinnyi ni Niyomugabo Augustin, Ntayomba Emmanuel, Izere Rutsindura Brillant Brave, Karenzi Brian, Cyusa Ntaganira Emmanuel, Ishema Kevin, Muhizi Ngoga Bonheur, Gakumba Patrick, Mutabazi Pacifique, Kizito Murenzi Romain, Irakoze Jules na Rutatika Dick Sano ari we kapiteni w’iyi kipe. Umutoza mukuru ni Murenzi Yves wungirijwe na Kamanzi Janvier na Humud David akaba ari umuganga w’ikipe.
Tariki 07-07-2019
Rwanda-Cote d’Ivoire
Tariki 08-07-2019
Rwanda-Guinea
Tariki 09-07-2019
Rwanda-Mali
Tariki 10-07-2019
Rwanda-Tunizia
