Rutahizamu w’ikipe y’igihugu y’u Rwanda “Amavubi”, Sugira Ernest ni we watsinze igitego kimwe rukumbi, Amavubi yatsinze Ethiopia mu mukino ubanza wo gushaka itike y’imikino ya nyuma y’Afurika y’amakipe y’ibihugu mu bakinnyi bakina imbere mu gihugu “CHAN 2020”.
Uyu mukino wabereye kuri Sitade Mekelle muri Ethiopia, ikipe y’u Rwanda itari ifite kapiteni Haruna Niyonzima ndetse n’umunyezamu wa mbere, Kimenyi Yves yabonye igitego ku munota wa 60 gitsinzwe na Sugira Ernest, usanzwe ari rutahizamu w’ikipe ya APR FC.
Gutsinda uyu mukino byatumye ikipe y’u Rwanda yiyongerera amahirwe yo kubona itike ya CHAN 2020 izabera muri Cameroun. Gusa nyuma y’uyu mukino ubanza, tariki 18 Ukwakira 2019 hazaba umukino wo kwishyura ari bwo hazamenyekana ikipe izabona itike.
Ikipe y’u Rwanda iyi ni insinzi ya 4 mu marushanwa atandukanye ibonye yikurikiranya dore ko mu gushaka itike y’igikombe k’Isi 2022 yatsinze Seychelles ibitego 10-0 mu mikino ibiri mu gihe mbere yo gukina na Ethiopia yatsinze RDC ibitego 3-2 mu mukino wa gicuti.
Iyi ni inshuro ya 3, u Rwanda na Ethiopia zihuye mu gushaka itike ya CHAN. Ethiopia yitabiriye CHAN 2014 isezereye ikipe y’u Rwanda naho muri 2018, ikipe y’u Rwanda nayo yitabira nyuma yo gusezerera Ethiopia.
Ikipe y’u Rwanda imaze kwitabira iri rushanwa inshuro 3 (2011, 2016 na 2018) mu gihe Ethiopia ari inshuro 1 (2014)
Iri rushanwa ryatangiye gukinwa muri 2009, Ikipe y’igihugu ya RDC ni yo imaze kwegukana iki gikombe inshuro nyinshi 2 (2009 na 2016), Tunizia (2011), Libya (2014) na Maroc (2018).
Abakinnyi babanjemo ku mpande zombi
Ethiopia: Mentsenot Alo, Desta Demu, Aschalew Tamene, Yared Baye, Ahemed Reshid, Amanuel Yohannes, Hayeder Sherefa, Kenean Markneh, Amanuel, Fekadu Alemu na Mesfen Tafesse.
Rwanda: Ndayishimiye Eric Bakame, Manzi Thierry, Mutsinzi Ange, Fitina Ombolenga, Imanishimwe Emmanuel, Nsabimana Eric, Niyonzima Olivier Sefu, Nshimiiyimana Amran, Iranzi Jean Claude (Iradukunda Eric), Manishimwe Djabel (Buteera Andrew) na Sugira Ernest (Mico Justin).
Tariki 18-10-2019
Rwanda-Ethiopia (Kigali)
