Amakuru

Umwirabura wa mbere muri Afurika yishwe na Coronavirus

Amakuru aturuka i Ouadadougou muri Burkina Faso aremeza urupfu rw’umuntu wa mbere munsi y’Ubutayu bwa Sahara wahitanwe na Coronavirus.

Prof Martial Oaedraogo ushinzwe guhuza ibikorwa bigamije guhangana n’iyi virusi muri Burkina Faso yabwiye itangazamakuru ati, “Umuntu wa mbere yishwe na Coronavirus, ni umugore w’imyaka 62, yari arwaye na diyabete akaba yari ari ahavurirwa abarwayi b’indembe.”

Abarwayi ba coronavirus muri Burkina Faso ni 27, barimo abagore 15 n’abagabo 12, harimo umwe uri mu Mujyi wa Bobo Dioulasso , ari na we wenyine uri hanze y’Umurwa Mukuru Ouagadougou.

Imibare yo kuri uyu wa Gatatu irerekana ko abagaragaweho coronavirus muri Afurika yose ari 576, nk’uko bitangazwa n’Ibiro Ntaramakuru by’Abanyamerika, AFP.

Muri abo 576, abapfuye ni 15 barimo batandatu baguye mu Misiri, 5 muri Algeria, 2 muri Morocco, umwe muri Sudan n’umwe muri Burkina Faso.

Muri Burkina Faso, kuwa Gatandatu tariki 14 Werurwe Leta yategetse ko amashuri yose afungwa, isaba ko ibikorwa by’inzego za Leta n’z’abikorera bihuruza abantu benshi na byo bihagarikwa kugeza mu mpera z’ukwezi gutaha kwa Kane.

Mu Rwanda, imibare itangazwa na Minisiteri y’Ubuzima irerekana ko abarwayi b’iyi ndwara ari umunani, barimo Abanyarwanda bane n’abanyamahanga bane.

Mu rwego rwo kwirinda ikwirakwizwa ry’iki cyorezo, u Rwanda rwafunze amashuri, ruhagarika ibikorwa bihuza abantu benshi birimo ubukwe n’ibizamini by’akazi mu nzego za Leta, rushishikariza abakozi gukorera mu ngo aho bishoboka.

Inama Abanyarwanda bagirwa muri ibi bihe, ni ugukaraba intoki n’isabuni n’amazi meza, bakriinda gusuhuzanya bakorana mu ntoki ndetse no guhoberana kuko byoroshya ihererekanywa ry’iyi virusi ya corona yahereye mu Bushinwa ikaba ikomeje kujegeza Isi.

Kanda utange igitekerezo

Subiza ku gitekerezo cyatanzwe

Your email address will not be published. Required fields are marked *

Solve : *
27 × 5 =


Most Popular

To Top