Leta Zunze Ubumwe z’Amerika zatangaje ko umuturage wazo wa mbere yishwe na Coronavirus imbere mu gihugu, muri leta ya Washington.
Amerika ivuga ko uwo murwayi wapfuye ejo kuwa gatandatu tariki ya 29 Gashyantare 2020 yari umugabo wo mu kigero cy’myaka 50 wari ufite n’ubundi burwayi.
Donald Trump Perezida wa Amerika yavuze ko bishoboka ko hari abandi bantu banduye ubu bwoko bushya bwa Coronavirus bazaboneka, ariko yongeraho ko igihugu cyiteguye uko byagenda kose.
Yagize ati : “Nta mpamvu yo guta umutwe na busa ihari, turiteguye kandi iyi Virusi tuzahangana nayo.”
Mike Pence, Visi-Perezida w’Amerika, yavuze ko uburyo busanzweho mu gihugu bwo kubuza ko abantu bavuye muri Iran bagera muri Amerika bwaguwe, ubu bukaba bwashyizwemo n’undi munyamahanga uwo ari we wese wageze muri Iran mu minsi 14 ishize.
Iran ni yo yatangaje impfu nyinshi z’abishwe na coronavirus bo hanze y’Ubushinwa yatangiriyemo mu mwaka ushize.
Pence yanashishikarije Abanyamerika kudasura ibice byo ku Isi byibasiwe cyane na coronavirus, nk’Ubutaliyani na Koreya y’Epfo.
Kompanyi yo gutwara abantu mu ndege “American Airlines” yavuze ko yahagaritse ingendo zerekeza mu mujyi wa Milan wo mu Majyaruguru y’Ubutaliyani.
Iyi kompanyi y’indege kandi yavuze ko izajya ikora urugendo rumwe ku munsi ruva muri Amerika rujya mu Butaliyani, hagati ya Philadelphia n’umujyi wa Roma.
Usibye Amerika, kuri iki cyumweru, ibihugu bya Australia na Thailand nabyo byatangaje abantu ba mbere bishwe na coronavirus.
Umugabo w’imyaka 78 wo muri Australia yahitanwe nayo, nyuma yo kuyandura mu kwezi gushize ayanduriye mu bwato Diamond Princess buparitse ku cyambu cyo mu Buyapani.
Thailand nayo irimo abantu 42 banduye iyi virusi, yatangaje ko umugabo w’imyaka 35 wishwe na coronavirus, gusa ngo yari arwaye n’indwara yo kubabara mu mitsi no mu ngingo iterwa n’imibu, izwi nka Dengue fever.
